درس نحو موضوع للنقاش وارجو الرد

الموضوع دة وصلنى على الاميل وشدنى فقلت اجبهلكم واعرف رتئيكم

درس نحو موضوع للنقاش وارجو الرد VBK32058

[
الأمثلة
تجلس البنات في المترو
يقف الشباب في المترو
إن البنات مفتريات
إن الشباب غلبانون
الشرح
ياجماعة احنا لازم نعمل وقفة .. من اللى هيه كده
دلوقتى الأخت سحر الجعارة تطلع تقول ان المرأة لها نفس حقوق الرجل في المجتمع،والأخت إيناس الدغيدى تطلع تقول قصدى تقلع تقول ان الراجل همجى مش بيعرف في المرأة غير جسمها،والأخت إقبال بركة تقول إن مصدر جمال المرأة هو عقلها مش جسدها ولازم التعامل معاها كعقل بدون النظر إلى الجسد هيه عاملة فيه ايه.. ده باعتبار ان الواحدة تبقى ماشية في الشارع وواحد بقى يعاكسها يا ابو عقل جامد..ياواد انت ياابو مخيخ ملبن..حوش شعرك عشان نشوف جمال عقلك يا قمر
والواحد بقى يكلم صاحبه وهما شايفين بنت ماشية.. شفت ياد العقل اللى لابس أحمر ده؟؟
كل الكلام ده ماشى
والأخت هالة سرحان بيجيلها تخلف عقلى لو سمعت ان راجل قال لمراته حضَّرى العَشا..باعتبار ان العشا رجس من عمل الشيطان
والأخت العزيزة سعاد حسنى تقول البنت زى الولد ماهيش كمالة عدد..ومش عارف مين قال ان البنت كمالة؟؟ البنت طبق كشرى بحاله من الكبير ابو تلاتة جنيه.. زيه زى الولد بالظبط
والأخت عبير صبرى ربنا يهديها تقول ازاى الراجل المتوحش القاسى التنين اللى بيطلع نار من مناخيره بيتعامل مع الأنثى اللى هيه نسمة ماشية ع الأرض يا ولداه
طبعا انا باعدى الكلام ده لأنى عارف الولد المحترم بيعامل البنت المحترمة ازاى.. والزوج المحترم بيعامل الزوجة المحترمة ازاى ومش محتاجين نصايح اسم الله على جمالهم وأدبهم اللى فاتوا
المشكلة بقى مادام بيقولوا البنت زى الولد.. أنا ليه باقف في المترو عشانهم بقى؟؟ أيوة اوعى تمشى استنى..دى مشكلة كبيرة مش صغيرة..يعنى أنا لما اركب المترو كام مرة في اليوم وكل مرة اكتشف انى لازم اقف عشانهم تبقى مشكلة
أدخل المترو في أمان الله واقعد بعد جهد جهيد وانا شايف واحدة موظفة مع صاحبتها راجعين من الشغل وصحتهم زى الفل.. وقاعدة تحكى لها ازاى تعمل محشى الكوسة وقاعدة تقور في الهوا يمين وشمال عشان يبقى الشرح عملى وصوتها عالى.. واول ما تدخل المترو تلاقى الشلل الرعاش حلّ عليها.. وعينيها مش قادرة تفتح من الإرهاق وتيجى هيه وصاحبتها قدامى بالظبط وتعلـّى صوتها وتقول لصاحبتها:معدتش باقدر أقف كتير يا سنية.. ترد عليها زميلتها واللبانة ف بقها: ومين سمعك يا حبيبتى..الدكتور قال لى انى لو وقفت على رجلى خمس دقايق هارجًّع ع اللى قدامى علطول
وللا البنت اللى لسة شباب.. تبقى قاعد لا بيك ولا عليك وتلقى المحروسة داخلة المترو .. بنت حلوة وشعرها ع الخدود يهفهف ويرجع يطير.. وتيجى تقف قدامك.. وفجأة تفضل تظبط شعرها وترميه ورا ضهرها زى إعلان صابون كامى عطر فرنسى الإيحاء..ومتوقعة ان الزبون اللى هوه انا هاقوم ابوس ايديها انها تقعد مكانى.. والله لو خلعتى شعرك كله واديتهولى على سبيل المقايضة زى قدماء المصريين..برضه مش واقف
وبعدين الأول كانت عربيات السيدات في المترو قدام ومع ذلك كانوا منتشرين في كل العربيات وقلنا ماشى..بعد ماحصلت حادثة مترو حلوان البسيطة اول المترو.. قالوا لا .. هاتوا السيدات في نص المترو..ليه بقى؟؟ ده باعتبار ان لو حادثة حصلت في أول المترو والسيدات قدام هيصوتوا ويلموا الدنيا.. انما الرجالة بتموت من سكات!!!صلاة النبى
طب حد مننا اعترض ان السيدات ماليين مترو الرجالة.. أبدا..انما شوف بقى ياعم الحاج لو حظك الأغبر وقعك انك ركبت سهوا في عربية السيدات..ياداهية دقى..تسمع بقى أحلى كلام.. أولالا..سوفاااج..سوهاج..راجل؟؟..واللى تحط وشها في الأرض من الكسوف..واللى تقول أوووه.. راجل..فانتساتيك..صلاة النبى.. انتى عمرك ماشفتى راجل ياضنايا؟؟؟مش برضه انتى جاية من شغلك وهوه هناك وراجعة بيتك هتلاقى واحد من نفس الفيرجن في وشك زى القضا المستعجل
والبنت اللى في الجامعة آه لو شافت راجل في المترو.. هيغمى عليها من الخضة.. ماانتى لسة جاية من الجامعة وكنتى انتى والولاد قاعدين تلعبوا صلح وعسكر وحرامية.. عمرك ماشفتى راجل يا شابة؟؟؟
أيوة مادام فيه مساواة تبقى ف كل حاجة.. زى ماانا باشتغل وهيه بتشتغل.. يبقى اللى يلحق الكرسى يقعد باعتبار انها إبراهيم ابن خالتى يعنى عادى..ومادام فيه مساواة ولازم نتعامل مع عقل البنت.. يبقى بلاش تلعب لى ف شعرها وتورينى دايما انها بتحط هيد أندشولدرز ضد القشرة عشان اقوم..لأنها زى ما بتحط هيد أندشولدرز أنا باحط برضه هيد أنشولدرز ومن الحجم الكبير كمان أبو عشرين جنيه..
المشكلة دى يحس بيها اللى بيركب المترو يوميا زيى.نفسى أحس انى جاى بدرى ولحقت كرسى بعرق جبينى وقاعد أصلى ركعتين شكر على الكرسى اللى فلت من بين يدى القوات الأنثوية الغاشمة
اوعى حد يفتكر انى مش باقوم عشان حد يقعد..بس اقوم عشان حد يستاهل.. يعنى ست كبيرة مريضة.. راجل عجوز تعبان.. ست شايلة تسع عيال على ايديها..كده يعنى.. حالات تستاهل.. انما واحدة عندها تلاتين اربعين سنة وقاعدة عاملالى فيها حسين رياض لما اتخرس في رد قلبى.. أقف ليها ليه؟؟
وكمان شوف الموقف ده.. اقف أنا عشان واحدة ست تقعد..واقف جنبها..وأول ما تيجى تنزل محطتها تشاور لاقرب بنت أو ست عشان تقعد مكانها!! صلاة النبى..حتى الكرسى بيتورث يا جدعان؟؟ خيال مآتة واقف جنب الكرسى أنا؟؟؟دانا واقف عشانك..طب خليها بجميلة حتى..وموقف ورا موقف تكتشف في لحظة ان كل الستات والبنات قاعدين..وكل الرجالة ماسكين جرايد وقاعدين يهووا عليهم: ألف ليلة وليلة.. قصة كل ليلة..احكى ياشهرزاد.. احكى لشهريار
وللا البنت اللى تيجى تقعد جنبك ومش طايقة نفسها قال إيه المكان ضيق ومش قادرة تقعد مرتاحة..طب ما دام انتى متضايقة كده ماتقومى تقفى بلاش القعدة المقرفة دى.. وللا يعنى عشان كل مرة واحد محترم شباب هوه اللى يقف عشان المكان يوسع للهانم.. أم طاقية.. طاقية حمرا.. للهانم البيضا.. والهانم السمرا
القاعدة
الله يخرب بيت هالة وإيناس وسحر وعبير وإقبال وكل اللى عقدونا ف عيشتنا بكلامهم اللى لا دين ولا منطق بيأيده..بيطالبوا بحقوق المرأة اللى على كيفهم.. مع ان ديننا جعل المرأة جوهرة يتحافظ عليها وتتعامل أحسن معاملة مش سلعة وموضوع في كل برنامج شوية.
لو كنت قاعد على كرسى في المترو.. دايما حاول انك تربط رباط جزمتك وانت قاعد لمدة العشرين محطة اللى انت راكبهم وماتبصش لأى حد واقف عشان قلبك المعفن الطيب
خد معاك وانت راكب المترو..علبتين هيد أنشولدرز عشان أى بنت جاية تتدلع بشعرها عشان تقعد تعرفها ان اللى معاه شامبو أكتر هوه اللى هيقعد
خد معاك مطوة عشان لو قلبك الطيب خلاك تقعَّد واحدة منك وبعدين وهيه نازلة شاورت لواحدة تانية تقعد مكانها وطنشتك.. تغزها بالمطوة غزتين عشان تفوق
إن وأخواتها تنصب اسمها وترفع خبرها!!

[/url]

انا من اسكندرية وعمرى ما ركبت مترو هل فعلا الكلام دة بيحصل فية

وهل الغلط على الشاب ولا على البنت اللى اهلها سامحين ليها تنزل وحاطة مكياج كامل ولو فعلا البنت لبسها وحش ومعديو من جنبك ليه متغضش بصرك بس فعلا فى بنات كتير محترمة وبتتعاكس فى بنات منقفة وبتتعاكس
واللى بيحصل اكتر من كدة الشباب اللى معا هم عربيات ويفتح باب العربية للبنت علشان تركب معاة
فنحن اصبحنا نفتقد الرجل الشهم الملىء بالرجولة والشهامة والجدعنة زى ما بيقولوا زى ما يكون كل واحد فيهم ملوش أم أو اخت أو زوجة
الرجل بيعمل اللى هو عاوزه أنما الست لا عيب ميصحش أنتى بنت لكن هو راجل ياسلام يعنى ايه راجل يعنى طب ما راجل يحترم نفسه وميغلطش عشان يكون قدوه متعملش الحاجة اللى أنت نفسك بترفضها لو بنت أو ست عملتها ياجماعة أحنا مش ضد الرجل ولا ضد المرأة أحنا بس عاوزين عدل فى الأمور اللى الدين أمر بيها

تحيالى للجميع

جميل اوى يا دودو انك تلاقى حد بيكتب كلام انتى نفسك تقوليه ويمكن قلتيه مليون مرة قبل كدا وناقشتى فيه ناس كتير
والكل يهاجمك ويتعاؤض معاكى
اللى كاتب الموضوع دا بجد ممتاز ف اسلوبه وتجسيمه للامور مع اضافة بعض الفكاهة اللى المصرى متعود عليها بطبيعته

فعلا انا بحتقر الناس الى زى ايناس هانم الدغيدى والست هالة سرحان والست سحر جعارة ال وعبير زفت الى اتحجبت وخلعت الحجاب وغيرهم وغيرهم بجد من الناس اللى فكرت ان عقلها اللى عطاهولها ربنا يقدروا بيه يغيروا رحمة ربنا اللى نزلها بين الزوجة والزوج . يغيروا بيه روح الالفة بينهم . يغيروا بيه كل شئ جميل من روح تعاون وروح محبة بين الزوجين

يا جماعة القراءن والاسلام كرم المرأة تكريم لما يحدث ولن يحدث ف اى وقت ومكان ... لسنا بحاجة لتجارب اجنبيه فاشلة فشل ذريع

لما انا بركب مواصلة والاقى بنت واقفة وفى زحمة وان دا هيعرض البنت لمضايقات .... دى اختى بالظبط ... وان ما سبتلهاش مكانى ... ما ابقاش رجل ولا هيا كدا تبقا ست ... فى فرق ولا لأ ؟؟؟؟ بينى وبينها ؟؟؟؟ ليه انا بعمل كدا ؟؟؟ ومن اى منطلق؟؟؟؟
من منطلق انى مسلم وانى لازم احافظ على اى بنت محترمة لانها اختى او امى ف النهاية

لما يكون الجيش من الرجال فقط كى تعيش النساء امنة ف بيوتها محافظة على اهلها وزوجها واولادها تنشئ الرجال اللى بيخشوا الجيش ويدافعو عن البلد ......... يبقا فى فروق ولا لأ ............ اظن الرد واضح . . . ربنا خلق الرجل رجل والمرأة مرأة

ويارب كل بنت فى المنتدى تحاول ان تتعامل بالدين قبل ان تتعامل مع شوية ستات اقل ما يقال عنهم انهم ........... اللى يعرف يقولى . ناس عاوزة تخرب بيوت المسلمين وبجد هما اللى بيهينوا المراة . لان الست مش سلعة زى ما قال كاتب الموضوع ..وشكرا

بشكرك كتير على ردك ومشاركتك للموضوع
فراشة

بيحصل والله يا دودو بس هقولك ع حاجة فعلا كل الاراء اللى جبتيها والام\ثال اللى اتطرحت دى عن ايناس وغيرها دول نموذج سئ للغايه فى وجهة نظرى للمرأة لانهم بيدعو لحاجات غريبه ومتخلفة يارب ربنا يهيدهم بجد لانهم خرجواااااااااااااا عن كل حدود ما ياقل انه ع الاقل احترام ونسو بل وتناسو تعاليم الاسلام للمرأة وان الرسل عليخ الصلاة والسلام قال فيما معناه لو كنا اؤمرنا ان نسجد لغير الله لكانت المرأة ان تسجد لزوجها مش عارف بجد هما بيتعملوا الحاجات دى فين ولا فين وفعلا نايس توبك يا ددود ودايما كدا تنورينا يارب